وزیراعظم محمد شہباز شریف نے جنوبی وزیرستان کے علاقے وانا کے کیڈٹ کالج پر فتنۂ الخوارج کے دہشت گردوں کے حملے کی شدید مذمت کرتے ہوئے کہا ہے کہ بزدل دشمن نے ایک بار پھر تعلیمی ادارے کو نشانہ بنانے کی کوشش کی، جسے سیکیورٹی فورسز نے بروقت کارروائی کے ذریعے ناکام بنا دیا۔
وزیراعظم نے سیکیورٹی فورسز کی جانب سے مؤثر جوابی کارروائی میں دو دہشت گردوں کو ہلاک کرنے پر انہیں خراجِ تحسین پیش کیا۔
ان کا کہنا تھا کہ ملک کی حفاظت کے لیے ہماری سیکیورٹی فورسز سیسہ پلائی ہوئی دیوار کی طرح کھڑی ہیں۔
وزیراعظم نے کہا کہ سیکیورٹی فورسز کا غیر متزلزل عزمِ استحکام دہشت گردوں کے ناپاک عزائم کو ناکام بنا دے گا۔ انہوں نے اس عزم کا اعادہ کیا کہ ملک سے ہر قسم کی دہشت گردی کا مکمل خاتمہ کیا جائے گا۔
شہباز شریف نے کہا کہ قوم اپنے بہادر سپاہیوں کے ساتھ کھڑی ہے اور پوری قوم سیکیورٹی فورسز کو سلام پیش کرتی ہے۔
وزیرِ داخلہ محسن نقوی کی مذمت اور سیکیورٹی فورسز کو خراجِ تحسین
وفاقی وزیرِ داخلہ محسن نقوی نے بھی کیڈٹ کالج وانا پر دہشت گرد حملے کی شدید مذمت کی اور فورسز کی بروقت کارروائی کو سراہا۔
انہوں نے کہا کہ سیکیورٹی فورسز نے غیر معمولی پیشہ ورانہ مہارت کا مظاہرہ کرتے ہوئے فتنۂ خوارج کے حملے کو ناکام بنایا اور دو دہشت گردوں کو جہنم واصل کیا۔
محسن نقوی نے کہا کہ سیکیورٹی فورسز نے بہادری اور مستعدی کے ساتھ دشمن کے عزائم خاک میں ملا دیے۔ قوم کو اپنی افواج اور قانون نافذ کرنے والے اداروں پر فخر ہے۔
وزیرِ داخلہ نے مزید کہا کہ کیڈٹ کالج پر حملہ ناکام بنانے پر ہم اپنی فورسز کی جرات و قربانیوں کو سلام پیش کرتے ہیں۔
