شدید دھند کا راج برقرار، موٹر وے کے مختلف سیکشنز ٹریفک کے لیے بند
دھند میں لین کی خلاف ورزی سنگین حادثات کا سبب بن سکتی ہے
-
ویب ڈیسک -
January 12, 2026
شدید دھند کے باعث ملک کے مختلف حصوں میں موٹرویز کو ٹریفک کے لیے بند کر دیا گیا ہے۔ ترجمان موٹروے پولیس سنٹرل ریجن سید عمران احمد کے مطابق عوام کی جان و مال کے تحفظ کے پیش نظر یہ فیصلہ کیا گیا ہے۔
ترجمان کے مطابق موٹروے ایم-3 جڑانوالہ سے درخانہ تک شدید دھند کے باعث مکمل طور پر بند کر دی گئی ہے۔ اسی طرح لاہور–سیالکوٹ موٹروے ایم-11 کالا شاہ کاکو سے سمبڑیال تک بھی دھند کے باعث ٹریفک کے لیے بند ہے۔
موٹروے ایم 2 لاہور سے ہرن مینار تک دھند کی وجہ سے ٹریفک کے لیے بند کر دی گئی ہے۔
مزید بتایا گیا ہے کہ موٹروے ایم-5 رحیم یار خان سے روہڑی تک دھند کے باعث بند کر دی گئی ہے، جبکہ موٹروے ایم-4 گوجرہ سے عبدالحکیم تک بھی ٹریفک معطل ہے۔
ترجمان موٹروے پولیس کا کہنا ہے کہ دھند میں لین کی خلاف ورزی سنگین حادثات کا سبب بن سکتی ہے، اس لیے تمام روڈ یوزرز لین ڈسپلن پر سختی سے عمل کریں۔
شہریوں کو ہدایت کی گئی ہے کہ وہ دن کے اوقات میں سفر کو ترجیح دیں اور دھند کے دوران صبح 10 بجے سے شام 6 بجے تک کے وقت کو محفوظ سفری اوقات سمجھا جائے۔
ڈرائیور حضرات کو فوگ لائٹس کے لازمی استعمال، تیز رفتاری سے گریز اور آگے چلنے والی گاڑی سے محفوظ فاصلہ رکھنے کی ہدایت بھی کی گئی ہے۔ غیر ضروری سفر سے اجتناب کرنے پر بھی زور دیا گیا ہے۔
مزید رہنمائی اور کسی بھی قسم کی مدد کے لیے شہری موٹروے پولیس ہیلپ لائن 130 پر رابطہ کر سکتے ہیں۔
