ڈھاکہ: بنگلا دیش کرکٹ ٹیم کے سابق کپتان اور آل راؤنڈر شکیب الحسن نے غیر قانونی بولنگ ایکشن سے متعلق حیران کن انکشاف کردیا۔
شکین الحسن کے اس انکشاف نے دنیائے کرکٹ کے حلقوں کو ورطہ حیرت میں ڈال دیا ہے، جس میں انھوں نے اپنے بولنگ ایکشن سے متعلق انتہائی اہم راز کو فاش کیا ہے۔
مزید پڑھیں: مشکوک بولنگ ایکشن، شکیب الحسن کو بولنگ کرانے سے روک دیا گیا
یاد رہے کہ شکیب الحسن کے بولنگ ایکشن کو 2024 میں انگلش کاؤنٹی کی جانب سے کھیلتے ہوئے غیر قانونی قرار دیا گیا تھا جس کی وجہ سے انہیں معطل بھی کردیا گیا تھا۔
ایک انٹرویو میں شکیب الحسن نے انکشاف کیا کہ میرا خیال ہے میں نے تھوڑی بہت جان بوجھ کر غیر قانونی ایکشن کے ساتھ بولنگ کی۔
انہوں نے بتایا کہ میں نے سرے کی جانب سے سمر سیٹ کے خلاف میچ میں 70 سے زائد اوورز کیے اور اپنے کیرئیر میں کبھی ٹیسٹ میچ میں بھی اتنے اوورز نہیں کیے تھے۔
مزید پڑھیں: شکیب الحسن کا ٹیسٹ اور ٹی ٹوئنٹی انٹرنیشنل سے ریٹائرمنٹ کا فیصلہ
شکیب الحسن نے کہا کہ میں لمبی بولنگ کرکے بہت تھک چکا تھا، پاکستان کے خلاف بیک ٹو بیک ٹیسٹ میچز کھیلے تھے، ہم نے پاکستان کے خلاف ٹیسٹ سیریز جیتی اور پھر میں 4 روزہ کرکٹ کی طرف چلا گیا۔
آل راؤنڈر کا کہنا تھا کہ میں سوچ رہا تھا امپائر مجھے وارننگ دیں گے لیکن انہوں نے قانون کے مطابق کام کیا، رپورٹ کیے جانے پر میں نے شکایت بھی نہیں کی، میں بولنگ ایکشن کے ٹیسٹ میں فیل ہوگیا، پھر دوبارہ ٹیسٹ دیا اور وہ کلیئر ہوا۔
بنگلادیشی آل راؤنڈر نے اس میچ میں مجموعی طور پر 63.2 اوورز کرائے تھے جبکہ شکیب الحسن کو رواں برس کے آغاز میں تیسرے ٹیسٹ کے بعد بولنگ کے لیے کلیئر قرار دیا گیا۔
