پی ایس ایل کی دو نئی ٹیموں کی نیلامی کل اسلام آباد میں ہوگی
نیلامی میں دو نئی فرنچائزز کے لیے دس کمپنیوں کے درمیان مقابلہ ہوگا، ٹیموں کی تعداد 6 سے بڑھا کر 8 کی جائے گی۔
-
ویب ڈیسک -
January 7, 2026
پاکستان سپر لیگ (پی ایس ایل) کے سیزن 11 میں شامل ہونے والی دو نئی ٹیموں کی نیلامی کل جناح کنونشن سینٹر میں منعقد ہوگی۔
یہ نیلامی شام 4 بج کر 15 منٹ پر شروع ہوگی اور شائقین اسے براہِ راست مختلف چینلز اور آن لائن پلیٹ فارمز پر دیکھ سکیں گے۔
پی ایس ایل کی نیلامی پی سی بی اور پی ایس ایل کے یوٹیوب چینلز کے ساتھ ساتھ ٹیپ میڈ، تماشا اور پی سی بی لائیو (یو کے) پر بھی نشر ہوگی۔
اس کے علاوہ اے اسپورٹس، جیو اسپورٹس، فاسٹ اسپورٹس اور پی ٹی وی اسپورٹس بھی نیلامی براہِ راست دکھائیں گے۔
نیلامی میں دو نئی فرنچائزز کے لیے دس کمپنیوں کے درمیان مقابلہ ہوگا جن میں ایم نیکسٹ، ڈہرکی شوگر ملز، ایف کے ایس، پرزم ڈیولپرز اور انوریکس سولر شامل ہیں۔ جاز، آئی ٹو سی، ولی ٹیکنالوجیز، ویگو ٹیل اور اوزی ڈویلپرز بھی اس مقابلے میں حصہ لیں گے۔
پی ایس ایل کے سیزن 11 میں ٹیموں کی تعداد 6 سے بڑھا کر 8 کی جائے گی اور یہ ٹورنامنٹ 26 مارچ سے 3 مئی 2026 تک کھیلا جائے گا۔ نئی فرنچائز کے ممکنہ شہر فیصل آباد، گلگت، حیدرآباد، مظفرآباد، راولپنڈی اور سیالکوٹ ہیں۔
نیلامی کے بعد معروف گلوکار راحت فتح علی خان کی خصوصی پرفارمنس بھی ہوگی۔ اس موقع پر پاکستان شاہینز اور ہانگ کانگ سپر سکسز جیسی فاتح ٹیموں کو بھی انعامات دیے جائیں گے۔
پی ایس ایل نیلامی ایونٹ کے لیے آفیشل ہیش ٹیگ #NewEra قرار دیا گیا ہے جس کے ذریعے شائقین اس تقریب کی تازہ ترین جھلکیاں اور اپ ڈیٹس حاصل کرسکتے ہیں۔
