پی ایس ایل کو 10 سال مکمل، پاکستان کرکٹ کی کامیابی ویڈیو کی صورت میں وائرل
لیگ نے لوگوں کے دلوں میں ایک خاص مقام بنایا اور دنیا بھر کے نامور کھلاڑیوں کا اعتماد حاصل کیا
-
ویب ڈیسک -
January 1, 2026
پاکستان سپر لیگ (پی ایس ایل) نے 2025 میں اپنے دس سال کامیابی سے مکمل کر کے نہ صرف ایک اہم سنگِ میل عبور کیا بلکہ یہ ثابت کر دیا کہ لیگ محض ٹی ٹوئنٹی کرکٹ کا ٹورنامنٹ نہیں بلکہ عالمی سطح پر ایک مضبوط اسپورٹس برانڈ بن چکی ہے۔
گزشتہ ایک دہائی میں پی ایس ایل نے شائقین کو شاندار کرکٹ کے علاوہ پاکستان کی مہمان نوازی اور انتظامی مہارت کا بھی بھرپور ثبوت دیا۔
ابتدائی دنوں سے لے کر آج تک لیگ نے لوگوں کے دلوں میں ایک خاص مقام بنایا اور دنیا بھر کے نامور کھلاڑیوں کا اعتماد حاصل کیا۔
Decade done ✅
— Pakistan Cricket (@TheRealPCB) January 1, 2026
بین الاقوامی کرکٹرز کی لیگ میں شرکت کی خواہش اس کی مسابقتی فضا، پیشہ ورانہ نظم و ضبط اور منفرد شناخت کی واضح دلیل ہے۔
یہ سفر آسان نہیں رہا۔ پاکستان کرکٹ بورڈ، فرنچائزز اور دیگر شراکت داروں کی مشترکہ کوششوں کی بدولت پی ایس ایل نے ہر مشکل کا سامنا کیا اور ہر چیلنج کو عبور کیا۔
خاص طور پر دسواں ایڈیشن انتہائی کٹھن حالات میں ہوا، لیکن پاک بھارت جنگ کے دوران بھی تمام میچز پاکستان میں کامیابی سے منعقد ہوئے، جس نے عالمی سطح پر پاکستان کی ساکھ اور اعتماد کو مزید مضبوط کیا۔
پی سی بی کی جاری کردہ شاندار ویڈیو میں اس کامیابی کے تمام لمحے جذبات کے ساتھ پیش کیے گئے ہیں، جو لیگ کی تاریخ، جدوجہد اور شائقین کے جوش و خروش کو دلوں تک پہنچاتی ہے۔
پی ایس ایل نے یہ ثابت کر دیا کہ کرکٹ صرف کھیل نہیں بلکہ جذبے، حوصلے اور قومی فخر کی علامت بھی ہے۔
