کوہلو میں سیکیورٹی فورسز کا انٹیلیجنس بیسڈ آپریشن، 5 بھارتی اسپانسرڈ دہشت گرد ہلاک
کارروائی کے بعد ہلاک دہشت گردوں کے قبضے سے اسلحہ اور بارودی مواد بھی برآمد کیا گیا۔
-
ویب ڈیسک -
December 26, 2025
راولپنڈی: بلوچستان کے ضلع کوہلو میں سیکیورٹی فورسز نے انٹیلیجنس معلومات کی بنیاد پر بڑا آپریشن کرتے ہوئے 5 بھارتی اسپانسرڈ دہشت گردوں کو ہلاک کردیا۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے بلوچستان کے ضلع کوہلو میں بڑا آپریشن کرتے ہوئے بھارتی اسپانسرڈ فتنہ الہندوستان سے تعلق رکھنے والے دہشت گردوں کے ٹھکانے کو مؤثر انداز میں نشانہ بنایا۔
آئی ایس پی آر نے بتایا کہ یہ کارروائی دہشت گردوں کی موجودگی کی مصدقہ اطلاع پر کی گئی۔ آپریشن کے دوران سیکیورٹی فورسز اور دہشت گردوں کے درمیان شدید فائرنگ کا تبادلہ ہوا جس کے نتیجے میں 5 بھارتی اسپانسرڈ دہشت گرد ہلاک ہوگئے۔
ہلاک ہونے والے دہشت گرد علاقے میں دہشت گردی کی متعدد کارروائیوں میں ملوث تھے اور سیکیورٹی فورسز سمیت معصوم شہریوں کو نشانہ بنانے کی سازشوں کا حصہ رہے ہیں۔
کارروائی کے بعد ہلاک دہشت گردوں کے قبضے سے اسلحہ اور بارودی مواد بھی برآمد کیا گیا جسے مختلف تخریبی کارروائیوں میں استعمال کیا جانا تھا۔
سیکیورٹی فورسز نے علاقے کو مکمل طور پر کلیئر کرنے کے لیے سینیٹائزیشن آپریشنز شروع کردیے ہیں تاکہ کسی بھی ممکنہ دہشت گرد عنصر کا خاتمہ یقینی بنایا جاسکے۔
آئی ایس پی آر کا مزید کہنا ہے کہ سیکیورٹی فورسز ملک میں امن و استحکام کے قیام کے لیے عزمِ استحکام ویژن کے تحت انسدادِ دہشت گردی کی کارروائیاں پوری ثابت قدمی سے جاری رکھے ہوئے ہیں۔
بیان میں واضح کیا گیا کہ سیکیورٹی فورسز اور قانون نافذ کرنے والے ادارے غیر ملکی اسپانسرڈ دہشت گردی کے مکمل خاتمے کے لیے پوری قوت کے ساتھ کارروائیاں جاری رکھیں گے۔
